Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Шанхай ынтымақтастық ұйымына мүше мемлекеттердің үкіметтері арасындағы климаттың өзгеруіне қарсы күрес саласындағы ынтымақтастық туралы меморандумның жобасы мақұлдансын.
2. Қазақстан Республикасының Қырғыз Республикасындағы Төтенше және Өкілетті Елшісі Әбілқайыр Бақтыбайұлы Сқақовқа Шанхай ынтымақтастық ұйымына мүше мемлекеттердің үкіметтері арасындағы климаттың өзгеруіне қарсы күрес саласындағы ынтымақтастық туралы меморандумға қағидаттық сипаты жоқ өзгерістер мен толықтырулар енгізуге рұқсат бере отырып, Қазақстан Республикасының Үкіметі атынан қол қоюға өкілеттік берілсін.
3. Осы қаулы қол қойылған күнінен бастап қолданысқа енгізіледі.
|
Қазақстан Республикасының Премьер-Министрі |
О. Бектенов |
| Қазақстан Республикасының Үкіметінің 2026 жылғы 28 тамыздағы № 779 қаулысымен мақұлданған Жоба |
Шанхай ынтымақтастық ұйымына мүше мемлекеттердің үкіметтері арасындағы климаттың өзгеруіне қарсы күрес саласындағы ынтымақтастық туралы
МЕМОРАНДУМ
Шанхай ынтымақтастық ұйымына (бұдан әрі – ШЫҰ) мүше мемлекеттердің үкіметтері, бұдан әрі Қатысушылар деп аталатындар,
климаттың өзгеруіне байланысты сын-қатерлерге ден қою жөніндегі ынтымақтастықты дамытуға ниет білдіре отырып,
климаттың өзгеруі әлемдік аса маңызды проблемалардың бірі болып табылатынын, оны шешу халықаралық қоғамдастықтың барлық мүшелерінің бірлескен тәсілдерін талап ететінін мойындай отырып,
әділеттілік қағидатын және әртүрлі ұлттық жағдайларды ескергендегі ортақ, бірақ сараланған жауапкершілік пен тиісті мүмкіндіктер қағидатымен қоса Біріккен Ұлттар Ұйымының (бұдан әрі – БҰҰ) Климаттың өзгеруі туралы негіздемелік конвенциясында және оған Париж келісімінде айқындалған қағидаттарды ұстанудың маңыздылығын атап көрсете отырып;
климаттың өзгеруіне қарсы күреске, оның ішінде парниктік газдар шығарындыларын азайту және сіңіру, сондай-ақ климаттың өзгеруіне бейімделу жөніндегі шараларды қабылдау арқылы бағытталған бірлескен күш-жігердің маңыздылығын атап өте отырып, бұл ретте орнықты даму мен кедейлікті жою дамушы елдер үшін бірінші кезектегі басымдықтар болып қала беретінін мойындай отырып;
2002 жылғы 7 маусымдағы ШЫҰ Хартиясын және 2007 жылғы 16 тамыздағы ШЫҰ-ға мүше мемлекеттердің ұзақ мерзімді тату көршілік, достық және ынтымақтастық туралы шартын басшылыққа ала отырып,
ШЫҰ-ға мүше мемлекеттер басшылары кеңесінің 2022 жылғы 16 қыркүйектегі климаттың өзгеруіне ден қою жөніндегі мәлімдемесін назарға ала отырып,
1992 жылғы 9 мамырдағы БҰҰ-ның Климаттың өзгеруі туралы негіздемелік конвенциясынан және 2015 жылғы 12 желтоқсандағы Париж келісімінен туындайтын халықаралық міндеттемелерге бейілділігін, сондай-ақ климаттың өзгеруіне қарсы тиімді іс-қимылдарды қамтамасыз ету үшін технологияларды әзірлеу мен беруді және әлеуетті арттыруды қоса алғанда, халықаралық ынтымақтастықты кеңейтудің маңызды мәнге ие екенін мойындай отырып, жаһандық климаттық күн тәртібін іске асыруға сындарлы үлес қосу ниетін растай отырып;
төмендегілер туралы өзара түсіністікке қол жеткізді:
Осы Меморандумның мақсаты климаттың өзгеруіне қарсы күрестегі өңірлік ынтымақтастықты нығайту және орнықты дамуға жәрдемдесу, Қатысушылардың климаттың өзгеруінің теріс салдарына төзімділігі мен бейімделу әлеуетін арттыру, сондай-ақ климаттың өзгеруін жұмсартуға және оған бейімделуге байланысты озық тәжірибе, білім мен технология алмасуға жәрдемдесу болып табылады.
Қатысушылар осы Меморандум шеңберінде ұлттық жағдайларға, басымдықтар мен мүмкіндіктерге қарай мынадай бағыттар бойынша ынтымақтастықты жүзеге асыратын болады:
климаттың өзгеруін жұмсарту және оған бейімделу мәселелерін, оның ішінде климаттың өзгеруінің әсеріне төзімді инфрақұрылымды жетілдіру мен жаңғыртуды қоса алғанда, тиімді климаттық саясатты әзірлеу және іске асыру саласында тәжірибе алмасу;
шығарындылары төмен экономикалық тиімді технологияларды ендіру арқылы парниктік газдарды сіңіруді арттыру немесе олардың шығарындыларын азайту саласында тәжірибе алмасу;
қолдануға болатын жағдайларда көміртегі нарықтарын дамыту және көміртегі бірліктерімен сауда жасау саласында тәжірибе алмасу;
климаттық тәуекелдерді және бейімделу шараларының тиімділігін бағалау, бейімделу жоспарларын әзірлеу және іске асыру бойынша тәжірибе және үздік практика алмасу;
ерте ескерту жүйесін нығайту бойынша тәжірибе алмасу;
Қатысушылардың өзара келісімі бойынша климаттың өзгеруі саласындағы мамандарды оқыту арқылы кадрлық әлеуетті дамыту;
БҰҰ-ның Климаттың өзгеруі туралы негіздемелік конвенциясын (БҰҰ КӨНК), Климаттың өзгеруі жөніндегі үкіметаралық сарапшылар тобын (КӨҮСТ) және Дүниежүзілік метеорологиялық ұйымды (ДМҰ) қоса алғанда, тиісті көпжақты алаңдар шеңберінде ШЫҰ-ға мүше мемлекеттердің климаттың өзгеруі мәселелері бойынша пікір алмасуы және қажет болған жағдайда ұстанымдарын үйлестіру.
Осы Меморандум шеңберіндегі ынтымақтастық, оның ішінде семинарлар, форумдар, дөңгелек үстелдер өткізу арқылы жүзеге асырылатын болады.
Осы Меморандумды іске асыруға байланысты мәселелер ШЫҰ-ға мүше мемлекеттердің климаттың өзгеруі мәселелері жөніндегі арнайы жұмыс тобының отырыстарында қаралатын болады.
Қатысушылардың әрқайсысы осы Меморандум шеңберіндегі қызметті жүзеге асыруға байланысты шығыстарды дербес көтеретін болады. Қатысушылар климаттың өзгеруін жұмсартуды және оған бейімделуді қаржыландыру саласында тәжірибе және озық практика алмасуды жүзеге асыратын болады, сондай-ақ қажет болған жағдайда климаттың өзгеруі мәселелері бойынша дамушы елдер мен өтпелі экономикасы бар елдер арасындағы және ШЫҰ-ға мүше мемлекеттер қатысушылары болып табылатын тиісті халықаралық тетіктер шеңберіндегі өзара іс-қимылды дамытатын болады.
Қатысушылардың әрқайсысы осы Меморандумды іске асыруға жауапты өз мемлекетінің құзыретті органын (органдарын) айқындайды және осы Меморандумға қол қойылған кезден бастап 30 күн ішінде бұл туралы Депозитарийді хабардар етеді. Депозитарий құзыретті органдар туралы ақпаратты басқа Қатысушыларға жібереді.
Құзыретті орган (органдар) өзгерген жағдайда осы Меморандумға Қатысушылар 30 күн ішінде Депозитарийді бұл туралы жазбаша түрде хабардар ететін болады.
Қатысушылардың келісуі бойынша осы Меморандумға өзгерістер мен толықтырулар енгізілуі мүмкін.
Осы Меморандумды қолдануға байланысты даулар мен келіспеушіліктер туындаған жағдайда Қатысушылар оларды консультациялар және келіссөздер арқылы шешеді.
Осы Меморандум белгіленбеген мерзімге жасалады және оған қол қойылған күннен бастап қолданылады. Осы Меморандум күшіне енгеннен кейін ШЫҰ-ға мүше болған мемлекеттердің Депозитарийге қосылу туралы құжатты беруі арқылы олардың қосылуы үшін ашық болады. Қатысушылардың кез келгені болжамды шығу күніне дейін кемінде 3 ай бұрын Депозитарийге бұл туралы жазбаша хабарлама жіберу арқылы осы Меморандумнан шығуға құқылы. Депозитарий шығу туралы хабарламаны алған күннен бастап 30 күн ішінде басқа Қатысушыларды осындай ниет туралы хабардар етеді.
Осы Меморандум халықаралық шарт болып табылмайды және халықаралық құқықпен реттелетін құқықтар мен міндеттемелерді туындатпайды.
Осы Меморандум Қатысушылардың мемлекеттері қатысушы болып табылатын халықаралық шарттардан туындайтын олардың құқықтары мен міндеттемелерін қозғамайды.
ШЫҰ Хатшылығы осы Меморандумның Депозитарийі болып табылады, ол осы Меморандумға қол қойылғаннан кейін 30 күн ішінде Қатысушыларға оның куәландырылған көшірмесін жібереді.
___ жылғы "___" ____ ____ қаласында орыс және қытай тілдерінде бір төлнұсқа данада қол қойылды, бұл ретте екі мәтіннің де мазмұны бірдей.
